Əhməd Cəfəroğlu və onun “Azərbaycan Yurd Bilgisi” dərgisi

Özet

Burada Əhməd Cəfəroğlunun azərbaycanşünaslıq üçün böyük əhəmiyyət daşıyan “Yurd bilgisi” dərgisindən, orada yer alan elmi araşdırmalardan bəhs edilir. Müəllif mühacir dərgisinin mövzu və problematikasının sistemli şəkildə təsnifatını verir, qeyd edir ki, mühacir mətbuatının ən sanballı nümunəsi olan “Azərbaycan yurd bilgisi” mətbu orqan olmaqla yanaşı, əhəmiyyətli akademik nəşr olmuş, Azərbaycan elminin, mədəniyyətinin və ədəbiyyatının öyrənilməsi üçün kifayət qədər materiallar dərc olunmuşdur. Klassik və müasir ədəbiyyat məsələlərini elmi əsasda ideoloji təzyiqdən azad şəkildə öyrənmək, obyektiv təhlilini vermək baxımından da dərginin ətraflı öyrənilməsi vacib məsələdir. Sovet dönəmindəki ədəbi prosesi düzgün dəyərləndirmək, müstəqillik dönəmində  ədəbiyyatın ortaya atılan bəzi mübahisəli ədəbi problemlərini həll etmək, ədəbi-elmi araşdırmalara yardımçı olmaq üçün bu dərgini vacib material, elmi məxəz hesab etmək olar. Milli şüura, milli intibaha təkan verən, azərbaycançılıq ideologiyasını dünyada təbliğ edən “Yurd bilgisi” həm də mühacir ziyalılarını bir araya toplamaq və bununla da mühacirətşünaslığın ümumi mənzərəsini əks etdirmək baxımından böyük əhəmiyyətə malikdir.